झापा । पछिल्लो समय कोशी प्रदेशका झापा,मोरङ लगायतका जिल्लामा रहेका सहकारी संस्थाहरुमा चोरीका घटना दिनप्रतिदिन बढिरहेका छन । पछिल्लो दुईसातामा मात्र ति जिल्लाहरुमा रहेका सहकारीहरुमा दर्जनौ चोरीका घटनाहरु भईसकेका छन ।
मोरङको लेटाङमा रहेको एकिकृत जनभावना सहकारी संस्था, सुन्दरहरैचामा रहेको हातेमालो बहुउद्धेश्यीय संस्था, बेलबारीमा रहेको लालीगुराँस बचत तथा ऋण सहकारी संस्थाहरुमा भएको चोरीको घटना नसेलाउँदै झापाका विभिन्न सहकारी संस्थाहरुमा तोडफोड र चोरी हुने क्रम बढेको छ ।
झापाको गौरादहमा मंगलबार एकैरात गौरादहका दुईवटा सहकारीमा चोरी भएको छ । गौरादह ५ स्कूलचौन बजारमा रहेको जनहित सहकारीमा कार्यालय फोडेर चोरी भएको हो । त्यस्तै गौरादह ५ चप्रामारीमा रहेको महारानी झोडा सहकारीमा पनि चोरी भएको जनाइएको छ । घटनाबारे जानकारी प्राप्त भएपछि प्रहरी टोली खटाइएको इलाका प्रहरी कार्यालय दमकले जनाएको छ ।
यसअघि गत चैत ५ गते राति गौरादह ९ बैगुनधुरास्थित शुभलक्ष्मी बचत तथा ऋण सहकारी संस्थामा चोरी भएको थियो । त्यस्तै केही दिनअघि हाम्रो नेपाल बचत तथा ऋण सहकारी संस्थाको हल्दिवारीको मंगलबारेमा रहेको शाखामा चोरी गर्ने प्रयास भएको थियो ।
त्यस्तै कर्णाली बचत तथा ऋण सहकारी संस्था बिर्तामोड ४, साना किसान कृषि सहकारी संस्था हल्दिवारी ४, एकता बहुउद्देश्यीय सहकारी संस्था हल्दिबारी लगायतका संस्थामा चोरी र तोडफोडका घटना भएका थिए ।
यसरी दिनप्रतिदिन सहकारीि संस्थाहरुमा चोरीका घटनाहरु बढिरहँदा बचतकर्ताको रकम जोखिममा मात्र परेको छैन,सहकारी संस्थाहरु प्रतिको बिश्वास समेत गुम्दै गएको छ । तसर्थ यस्ता चोरी र तोडफोडका घटना न्युनीकरणका लागि प्रहरी र प्रशासन थप चनाखो बन्ने बेला भएको छ । सहकारी संस्थाहरु प्रति आम नागरिकको विश्वास गुम्दै गएका बेला यस्ता घटनाहरुले थप शंका जन्माउनुका साथे बिश्वास समेत गुम्दै गएको छ ।
