धनगढी । धनगढी उपमहानगरपालिकाले कैलाली र कञ्चनपुरका थप चार स्थानीय तहलाई पनि शव चिस्यान सेवा दिने भएको छ ।
उपमहानगरपालिकाले कैलालीको गौरीगंगा नगरपालिका र कैलारी गाउँपालिका, कञ्चनपुरको पनर्वास र कृष्णपुर नगरपालिकालाई निःशुल्क शव चिस्यान सेवा दिन भएको हो ।
उपमहानगरपालिकाले चार वटै स्थानीय तहमा शव चिस्यान सेवा दिने गरी सम्झौता गरेको छ ।
चारवटै स्थानीय तहसँग बिहीबार शव चिस्यान सेवाबारे सम्झौता गरिएको उपमहानगरपालिकाले जनाएको छ । यी स्थानीय तहमा २०८२ को असार मसान्तसम्म शव चिस्यान सेवा प्रदान गरिने सम्झौतामा उल्लेख छ ।
धनगढी उपमहानगरपालिकाले यसअघि छिमेकी गोदावरी नगरपालिकामा पनि निःशुल्क शव चिस्यान सेवा सञ्चालन गर्दै आएको छ ।
उपमहानगरपालिकाका नगर प्रहरीले शव चिस्यान यन्त्र मृतकको घरसम्म पुर्याएर जडान गर्ने गरेका छन् ।
मृतकको अन्तिम संस्कार गरेपछि यन्त्र फिर्ता ल्याइने गरिन्छ । धनगढी उपमहानगरपालिकाले विदेशमा कसैको मृत्यु भएका व्यक्तिको शव घर नपुग्दासम्म सुरक्षित राख्न शव चिस्यान सेवा सञ्चालन गरेको थियो ।
